ಬಂಧನದ ಬಾಳು ಮೀರಿದನೋ
ಎದೆಯುದ್ದ ಬೆಳೆದವಗೆ ಮದುವೆಯ ಮಾಡಲು
ಚದುರ ಶರಿಫನ ಒಪ್ಪಿಸಲು | ಪಾಲಕರು
ಅಧಿಕ ಉತ್ಸ್ಶ ತೋರಿದರು |
ಹೇಳಿಸಿ ಗುರುವಿಂದ ಮೇಳೈಸಿ ಕನ್ಯೆಯನು
ತಾಳಿ ಕಟ್ಟಿಸಿ ಮದುವೆಯ | ಮಾಡಿದರು
ಬಾಳಿಗೆ ಶುಭವ ಕೋರಿದರು |
ಚಂದಾದ ಫಾತಿಮಾ ಕುಂದಿರದ ಕನ್ಯೆಯನು
ತಂದು ಮದುವೆಯ ಮಾಡಿದರು | ಹಾರೈಸಿ
ಗಂಧ ಪರಿಮಳ ಸೂಸೋದರು |
ಕುಂದಗೋಳ ನಾಯಕರ ಅಂದದ ಕುವರಿಯನು
ಚಂದದಿ ಕೋಡಿ ಬಾಳುವ | ಕಾಲದಲೆ
ಬಂಧನದ ಬದುಕು ಬೇಡಾಯ್ತು |
ಚಿತ್ತವನು ಗುರುವಿನಲಿ ಒತ್ತೆಯ ಇಡುತಿದ್ದ
ಎತ್ತು ಗಳೆಗಳನು ಮರೆತಂತೆ | ಹೆಂಡತಿಯ
ಸುತ್ತ ಸುಳಿಲಿಲ್ಲ ಶರಿಫನು |
ಹತ್ತಾರು ತಿಂಗಳಲಿ ಮುತ್ತಿನಾ ಮಗಳೊಬ್ಳ
ಹೆತ್ತಳು ತಾಯಿ ಫಾತಿಮಾ | ಮನೆತುಂಬ
ಎತ್ತಿ ಆಡಿಸುತ ನಲಿದಳು |
ಹುಟ್ಟಿದ ಮಗಳಿಗೆ ಗಟ್ಟಿ ಆಯುಷ್ಯ ವಿಲ್ಲದೆ
ಪಟ್ಟನೆ ಶಿವನ ಪಾದವ | ಸೇರಿದಳು
ಮೆಟ್ಟೊ ಊರ್ಗೋಲು ಕಳಚಿತು |
ಕರುಳಿನ ಹಸುಮಗಳು ಹರಪಾದ ಸೇರಿದರ
ಮರೆತು ಗುರುವಿಗೆ ನಿಜಭಕ್ತಿ | ತೋರುತ್ತ
ಬೆರೆತೋದ ದಿಟದ ಭಾವದಲಿ |
ಮಗಳ ಸಾವಿನ ದುಃಖ ಹಗಲೆಲ್ಲ ಕಾಡಿತು
ಸೋಗವಿಲ್ದೆ ತಾಯಿ ಬಳಲಿದಳು | ತವರಲ್ಲಿ
ಜಗದ ಯಾತ್ರೆಯ ಮುಗಿಸಿದಳು |
ಮೋಹದ ಹೆಂಡತಿಯ ಸಾವಿನ ಪರಸಂಗ
ಮಾವನ ಮನೆಯ ಹಂಗನು | ಹರಿಯುತ
ದೇವನಲಿ ಶ್ರದ್ಧೆ ಹೆಚ್ಚಿಸಿತು |
No comments:
Post a Comment