ಜಂಬೂ ದ್ವೀಪದ ಭರತ ಕ್ಷೇತ್ರವು
ಪರಮ ಧರ್ಮ ಸಂಗಮವು !
ಜಿನಮುನಿ ಸದ್ಗತಿ ಪಡೆದ ಸಾರವು
ಸುಂದರ ಕತೆಗಳ ಸಂಭ್ರಮವು !
ಬ್ರಾಜಿಷ್ಣು ರಚಿಸಿದ ವಡ್ಡಾರಾಧನೆ
ಹಳಹನ್ನಡದ ಮಾತಿಂಗೆ !
ತಲೆದೂಗುವನು ರಸಿಕ ಓದುಗ
ತಂತ್ರ ನಿರೂಪಣೆ ಸೊಗಸಿಂಗೆ !
ಕತೆಯುಪಕತೆಗೆ ಸಾವಯವದ
ಕರಳ ಬಳ್ಳಿಯ ಬಂಧನವು !
ಜೀವ ತಳೆದ ಪಾತ್ರ ಪಾತ್ರಕೂ
ಸೂಸು ಪರಿಮಳ ಚಂದನವು !
ಬೆನ್ನು ಹತ್ತಿದ ಉಪಸರ್ಗಗಳು
ಒಡ್ಡುವ ಸಂಕಟ ನೂರಾರು !
ಆರಾಧಣೆಯಲಿ ಸಾವನು ಗೆಲುವ
ಕೇವಲಿ ಮುನಿಗಳ ತವರೂರು !
ಕೇಳಿದ ಕತೆಗಳು ಅಳಿಯದೆ ಉಳಿದು
ಮನುಜನ ತಿದ್ದದೆ ಬಿಟ್ಟಿಲ್ಲ !
ಧರ್ಮ ವಾಙ್ಮಯ ಸಮಸಮ ಬೆಸೆದ
ಉನ್ನತ ಕೃತಿಗೆ ಸಾವಿಲ್ಲ !
೨೫-೦೫-೨೦೨೦
No comments:
Post a Comment