ಹಿಟ್ಟಿನ ಕೋಳಿಯ ಕೂಗು !
ನೆನಪಲ್ಲುಳಿದಿದೆ ಎಲ್ಲರ ಮನದಲಿ
ಅಮೃತಮತಿಯ ಪಾತ್ರ !
ಜನ್ನ ಕವಿಯು ಕೆತ್ತಿ ನಿಲಿಸಿದ
ಅದ್ಭುತ ಜೀವಿತ ಚಿತ್ರ !
ವಿಮಲ ಜಲದ ಹೊನಲನು ತೊರೆದು
ತಿಪ್ಪೆಯಲಾಡಿತು ಹಂಸ !
ಅಷ್ಟಾವಕ್ರನ ಗಾನಕೆ ಸೋತು
ರಾಜಗೆ ಮಾಡಿತು ಮೋಸ !
ತಾಯಿ ಮಗನ ಸಂಕಲ್ಪ ಹಿಂಸೆಗೆ
ಕೂಗಿತು ಹಿಟ್ಟಿನ ಕೋಳಿ !
ನಾಯಿ ನವಿಲು ಏಳು ಜನುಮವ
ಸುತ್ತಿ ಬರುವ ಪಾಳಿ !
ಜನ್ನಯಶೋಧರ ಚರಿತೆ ತಿಳಿಪುದು
ಹಿಂಸೆಯ ಸೂಕ್ಷ್ಮ ರೂಪ !
ಕಣ್ಣಿನ ಮುಂದೆ ಕಟ್ಟಿಬಿಡುವುದು
ಉಣುವ ಜೀವಿಯ ತಾಪ !
ಅದ್ಭುತ ಕಂದ ಛಂದದ ಬಳಕೆಯು
ನಾಲ್ಕು ಸಾಲಿನ ಪದ್ಯ !
ವಾಙ್ಮಯ ಪ್ರೇಮಿ ರಸಿಕರೆಲ್ಲರೂ
ಸವಿಯಲೇ ಬೇಕು ಚೋದ್ಯ !
ಚಂದ್ರಗೌಡ ಕುಲಕರ್ಣಿ
೨೩-೦೫-೨೦೨೦
No comments:
Post a Comment