ಶಬ್ದ ಯೋಗ |
ಮಣ್ಣು ನೀರು ಸಂಗದಲ್ಲಿ
ಪಲ್ಲವಿಸಿವುದು ಬೀಜ |
ಪದದೆದೆ ಸೀಳಿ ಹೊರ ಸೂಸುವುದು
ಬೆಡಗಿನ ಕತೆಯ ತೇಜ |
ಬಣ್ಣ ಕುಂಚ ಲಲಿತ ಗೆರೆಯಲಿ
ಚಿತ್ರ ಮೂಡುವಂತೆ |
ಉಕ್ಕಿ ಹರಿವ ಹೊನಲಿನಲ್ಲಿ
ಅಕ್ಷರ ಪದಗಳ ಸಂತೆ |
ಶಿಲ್ಪಿ ಚಳಕದ ಉಳಿ ಕೊಡತಿಗೆ
ಕರಗಿದ ಹಾಗೆ ಕಲ್ಲು |
ಮೂರ್ತ ರೂಪ ತಾಳ್ವುದು ಕವಿತೆ
ಮಾಡಲಾರದೆ ಗುಲ್ಲು |
ಸರಿಗಮ ಸ್ವರದ ಮಧುರ ನಾದದಿ
ಮೂಡಿ ಬರುವುದು ರಾಗ |
ಸಾವಿರ ಸಾವಿರ ಅರ್ಥದಲೆಗಳ
ಮೌನ ಶಬ್ದ ಯೋಗ |
ಎದೆ ಎದೆ ಮಿಡಿಯುವ ಭಾವ ಲಹರಿಗೆ
ಬರದು ಎಂದು ಸೋಲು |
ಎಲ್ಲರ ಮನಸನು ಗೆಲ್ಲುವ ಸೊಲ್ಲಿಗೆ
ಇಲ್ಲ ಯಾವುದು ಮೇಲು |
No comments:
Post a Comment