ಮಾತೆಂಬ ಜ್ಯೋತಿ

ಮಾತೆಂಬ ಜ್ಯೋತಿ|

ಮಾತನು ಹೇಗೆ ಶೋಧ ಮಾಡಿದ 
ಮಾನವ ಮೊಟ್ಟ ಮೊದಲಿಗೆ |
ಉಸಿರಿನ ಶಕ್ತಿಯ ಬಳಸಿಕೊಂಡು 
ಅರ್ಥವ ಕೊಟ್ಟ ತೊದಲಿಗೆ |

ಗಂಟಲು ನಾಲಿಗೆ ಹಲ್ಲು ತುಟಿಗಳ 
ಪಳಗಿಸಿಬಿಟ್ಟ ಭಾಷೆಗೆ |
ಅಕ್ಷರ ಶಬ್ದ ಉಚ್ಚರಿಸುತ್ತ 
ಬೆಳಕು ನೀಡಿದ ಮಾತಿಗೆ |

ಕತ್ತಲೆ ಕೂಪದಿ ಮುಳುಗಿರುತಿತ್ತು 
ಮಾನವ ಸಂಸ್ಕೃತಿ ಈ ಹೊತ್ತು |
ಮಾತಿನ ಜ್ಯೋತಿ ಬೆಡಗಿನ ನುಡಿಗಳು 
ಇರುತಿರಲಿಲ್ಲ ಯಾವತ್ತು |

ತಾ ಬೆಳೆದಂತೆ ಮಾತನು ಬೆಳೆಸಿದ
ಮನಸಿಗೂ ಮೀರಿದ ಚಿತ್ರಣಕೆ |
ಭಾವನುಭಾವ ವಚನ ಕೀರ್ತನ 
ಅವತರಿಸಿದವು ಕ್ಷಣಕ್ಷಣಕೆ |

ಸಾವಿರದಂತಹ ಸಾವಿರ ಭಾಷೆ 
ಅರಳಿ ನಿಂತಿವೆ ಲೋಕದಲಿ |
ಒಂದಕ್ಕಿಂತ ಒಂದು ಹೆಚ್ಚು 
ತಾಯಿ ನುಡಿಯ ತೂಕದಲಿ | 

ಯಾವುದು ಏನು ಕಂಡು ಹಿಡಿದರು 
ಭಾಷೆಗಿಂತ ಮಿಗಿಲಿಲ್ಲ |
ಮಾತು ಬರಹ ಇರದೋಗಿದ್ರೆ 
ಮಾನವ ಬದುಕಿಗೆ ಬೆಲೆಯಿಲ್ಲ |