nedariTTu kELu bhaaratava

ನೆದರಿಟ್ಟು ಕೇಳು ಭಾರತವ 

ಅಮ್ಮನ ಬಾಯಿಂದ ಗುಮ್ಮನ ಕತೆ ಕೇಳಿ 

ಸುಮ್ಮ ಕೂಡದ ತುಂಟನೆ | ನೀ ಕೇಳು

ಹೊಮ್ಮಿ ಮೂಡಿಹುದು ಭಾರತವು | 1 |

ಅಗ್ಗಳದ ಕತೆಯಿದು ಹಿಗ್ಗಿ ಕೇಳೆಲೆ ಕಂದ 

ಕುಗ್ಗಿದ ಮನಸು ಅರಳುವುದು | ಅಮೃತದ

ಸುಗ್ಗಿ ಸಂಭ್ರಮವ ಹಾಡುವುದು | 2 |

ಜಂಬು ದ್ವೀಪವು ಎಂಬ ಇಂಬಾದ ಹೆಸರಿನ 

ನಂಬಿಕೆಯ ನಾಡು ಭಾರತ | ದೇಶಕೆ 

ಕೊಂಬು ಮೂಡಿಸಿದ ಕತೆಕೇಳು | 3 |

ವ್ಯಾಸ ಭಾರತವಿಂದು ದೇಶ ಗಡಿಯನು ದಾಟಿ 

ಸಾಸಿರ ಭಾಷೆ ನುಡಿಗಳಲಿ | ಅರಿವಿನ 

ಕೋಶವಾಗಿರುವ ಬಗೆ ನೋಡು | 4 |

ತಿಳಿಯಾದ ನುಡಿಯಲ್ಲಿ ಕಳೆಗೊಂಡು ಅರಳುತ್ತ 

ಸುಳಿತೆಗೆದು ಹಬ್ಬಿ ಹರದಿಹುದು | ಭಾರತವು 

ಇಳೆಯ ಅತಿದೊಡ್ಡ ಕಥನವು | 5 |

ನೂರಾರು ನುಡಿಗಳಲಿ ಮೇರು ನುಡಿ ಮಾತಿನಲಿ 

ಸಾರಿ ಹೇಳಿರುವ ಭಾರತದ | ಕತೆಯಿಲ್ಲಿ

ಸೂರೆಗೊಂಡಿಹುದು ತ್ರಿಪದಿಯಲಿ | 6 |

ಗೊತ್ತಿದ್ದ ಕತೆಯನ್ನೆ ಮತ್ತೆಬರೆಹೊರಟಿರುವೆ 

ಸತ್ತು ಹೋಗಿಲ್ಲ ಕೌರವ | ಪಾಂಡವರು  

ನಿತ್ಯ ಬದುಕಿಯರು ನಮ್ಮಲ್ಲಿ | 7 |

ಎಲ್ಲರೂ ಹೇಳಿದ ಬಲ್ಲವರು ಓದಿದ 

ಮಲ್ಲರ ಚರಿತೆ ಸಾರುತ್ತ | ಭಾರತಕೆ 

ಮೆಲ್ಲನೆ ಉಸಿರು ತುಂಬಿರುವೆ | 8 |

ನಾಡಿನಲಿ ಚಿಗುರೊಡೆದು ಕಾಡಿನಲಿ ಪಲ್ಲವಿಸಿ

ಹಾಡಾಗಿ ಹರಿವ ಭಾರತವು | ಜನಪದರ 

ನಾಡಿಮಿಡಿಯುವ ಕಾವ್ಯವು | 9 |

ಅರಮನೆಯಲಿ ಹುಟ್ಟಿ ಗುರುಮನೆಯಲಿ ಬೆಳೆದು 

ಸರುವ ಲೋಕದ ಕತೆಸಾರೊ | ಭಾರತಕೆ 

ಸರಿಸಮನಾದುದೇನಿಲ್ಲ | 10 |

ಹಿರಿಕತೆ ಭಾರತಕೆ ಸರಿದೊರೆ ಯಾವುದು 

ಗುರುವ್ಯಾಸ ಮುನಿಯು ರಚಿಸಿದ | ಕಾವ್ಯವನು 

ಹರಪುತ್ರ ಗಣಪ ಲಿಪಿಸಿರುವ | 11 |

ಬದುಕಿನ ಭಾವಗಳು ಹದಗೊಂಡು ಬೆಸುಗೆಯಲಿ 

ಚದುರ ಕಾವ್ಯವನೆ ಮೂಡಿಸಿ | ನಲಿದಾವು 

ನೆದರಿಟ್ಟು ಕೇಳೊ ಭಾರತವ | 12 |

ಮನಭಾವದಾಚೆಗಿನ ಘನವಾದ ವಿಷಯಗಳ 

ಅನುನಯದಿ ಇಲ್ಲಿ ಮೂಡಿಸಿದ | ಭಾರತವ 

ಗುಣವರಿತು ಓದಿ ಸವಿಯುವುದು | 13 |

ಬಿತ್ತರದ ಕತೆಯನ್ನು ಒತ್ತಾಗಿ ಪೋಣಿಸಿ 

ಚಿತ್ತ ಭಾವವನೆ ತಟ್ಟುವ | ತೆರದಲ್ಲಿ 

ಕೆತ್ತಿಸಿದ ಚೇತನಕೊಂದಿಸುವೆ | 14 |

ಕತೆಯ ಹೂರಣವಿಲ್ಲಿ ಜತನ ಮಾಡಿಹೆನೆಂಬ 

ಅತಿಯಾದ ಮಾತು ಹೇಳಲು | ಹೊರಟಿಲ್ಲ 

ಮತಿವಂತ ನೀನೆ ವರೆಗಚ್ಚು | 15 | 

ದೇಸಿಯ ಮೂಲದ ಸಾಸದ ಈ ಕತೆಯು 

ಸೋಸಿ ಕಾವ್ಯದ ರೂಪದಲಿ | ಕೊಟ್ಟಂತ 

ವ್ಯಾಸ ಗುರುವಿಗೆ ವಂದಿಸುವೆ | 16 |

ಹತ್ತಾರು ನಾಡಲ್ಲಿ ಸುತ್ತಾಡಿ ಸುಳಿಸಿರುವ 

ಗೊತ್ತುಗುರಿ ಮೀರಿ ಬೆಳೆದಿರುವ | ಭಾರತವು 

ಚಿತ್ತ ಕದಿಯುವುದು ಸುಳ್ಳಲ್ಲ | 17 |

ನೂರೆಂಟು ನದಿ ಸೇರಿ ಮೇರು ಸಾಗರವಾಗಿ 

ಭಾರತದ ಕತೆಯು ಹಬ್ಬಿಹುದು | ಜನಮನವ 

ಸೂರೆಗೊಂಡಿಹುದು ಅನುಗಾಲ | 18 |

Sent from http://bit.ly/hsR0cS